كولّوماشيه

وبمد أيدى ف راسى طلعتلى جِنِيّه

على غير صفات الجن حلاوتها ف عِنَيّا

سألت كتير سؤالات والرد مش عندى

وهاجيب منين إجابات والسائله جِنِيّه

كولّوماشيه

سبحانه خالق قلوب مفالق حجر

وقلوب حناين فشر جناين شجر

وقلب فارس بطبعه حارس..بنا

حوالين جناين قلبه سور من حجر

كولّوماشيّه

الحلم يمامه بألف جناح


طيّاره فعقلى وعقلى براح


تضرب تهرب.. تلاتين مقلب


والوعد بقصر مالوش مفتاح

كولّوماشيّه

يا مدنه شامخه وسط ميت مقصوص


روحى وعاليه والكلام مرصوص


قولته ماقلته مش فارقه أقوالى


ولا فارقه تسمعنى والسمع منقوص

وعشقت!!

وعشقت

وعشقت و يوم ما عشقت أخترت غزال

سارح على طرف خيالى صحيح لكن وصّال

هايم ف الدنيا المحزونه على غير الحال

شارد ولا عمر شروده يسبب عندى ضلال

وعشقت

وأنا يوم ما أخترت

عشقت غزال

.....

السن

السن أيام وشهور وسنين بتدور

لو حظك حلو فعمرك مره هايجى الدور

يمكن تلقاه

وتشوف وياه

الشمس بتطلع وسط ظلام الليل بالنور

يمكن تلقاه

وتشوف وياه

البحر الهادر وسط سكون الكون بيفور

والدنيا حظوظ

لو حظك حلو فعمرك مره هايجى الدور

.........

الوصف

فى الوصف مفيش موصوف زيه

كدب الوصاف

خطّافه رموشه المحنيّه

حنيّة خُطاف

مزروعه جناين جوّه عنيه

ومنيش حلاف

مأسوره عيون الناس بإيديه

وده مش إنصاف

فى الوصف مفيش موصوف زيّه

كدب الوصاف

..................

وهاقولك أيه

وهاقولك أيه والحب حبيبى ماهوش أقوال

أخر موال ف الحب حبيبى خلاص أتقال

وصادفنى الحظ فعمرى المره 

حبيبى قابلت

وعشقت

وعشقت ويوم ما عشقت أخترت غزال

سارح على طرف خيالى صحيح لكن وصّال

هايم ف الدنيا المحزونه على غير الحال

شارد ولا عمر شروده يسبب عندى ضلال

وعشقت

وأنا يوم ما أخترت

عشقت غزال

كولّوماشيّه

آه يا ضهرى ياللى محنى ف أرض بور



أزرع ولا أحصد ف السواقى حالتى طور


سُـنّه وعايشها و الأمل حيلتى وزادى


يمكن لصبرى أصحى ألاقى الخير بحور

كولّوماشيّه

نظره بحسره والعيون منكاده

تحسد وتحقد. والشرور ولاده

لومك يلومك إن كنت تظلمها

جوعها ياكلها.والقصور ف زياده

الحب لعنه

الحب لعنه

وزرها شايلينه

بالخير جامعنا

وكلنا ناسينه

نهرب

نقرب

نرفض نجرب

ساكن قلوبنا

طبعنا عايزينه

أصل الحكايه

فطره وهدايه

تكره. تخالف

تدفع جبايه

كرهك.لنفسك

رادد فى قلبك

سنه وساننها

بارى البرايا

تسعد

ماتسعد

أخرك هاتبعد

لكن مسيرك

راجع لدينه

الحب لعنه

بالخير جامعنا

ساكن قلوبنا

طبعنا عايزينه

كولّوماشيّه

بكيت ولما طال البكا .........عاتبونى جَفنيّا


مسجون ولما ثار وأشتكى.. زعلانه يا عنيّا؟



قافله عليهم ليه ف المِحَن.. فُكى مقافيلك



حبس الدموع ممنوع ف الوطن.. وياريته بإيديّا

كعادة الرجال, فى مجتمعاتنا العربيه(التى كانت عربيه),الضعيفه,(والتى لم تكن كذلك),لا نبكى أمام الناس,فالبكاء من وجهة نظرنا ضعف ليس منا,ونحن كلّ الضعف,مهانة تعظم علينا,وكلنا مهانه,ولكنها العادة التى طالما تغلبنا,وأرجو أن نتغلب عليها.

ليس هذا إلا مرضاّ,وما أقسى أمراض القلوب,ضعاف ندعى القوةَ,والقوةُ ليست بالإدعاء.

 شاهدت منذ قليل مقطعاً مصوراً لأول رئيس زنجى للكيان الأشّر فى العالم الحديث.

شاهدته يلقى خطاباّ فى الناس, وأىُّ ناسٍ , كان يتكلم فى جمعٍ من اليهود, ليس بقليل,ولا أشد علىّ مما سمعت,

وبكيت,وحدى كما جرت العادةُ بينَ الرجال,بكيت كما لم أبكى من قبل,أعترانى إحساس عميق بالذل,والضعف,فما أهوننا على الناس.

وتذكرت قول رسول الله, (نحن قومٌ أعزّنا الله بالإسلام, فمن أبتغى العزةَ فى غير الله, أذلّه الله),صدقت يا سيدى يا رسول الله.

فقد أبتغينا العزةَ فى شيطانِ هذا الزمان,ونحن اليوم, أشدّ أهل الأرض ذلاً, وأضعفهم بين الناس.

االهم أنصرنا على أعداءك اعداء الدين