كوللوماشية

لو كنت قادر ع السرير وِسط النسا

أو كنت سَيد وِسط عيلة مفلسة

راجل ف حزب الناس بخيرك المديد

بس الرجولة ف حزبى عِشرة كوَيسة

كوللوماشية

لو كنت تقدر ع الجمل وقت إن غِضِب

لو كنت تقدر تِحتِمِل لسعة لهب

راجل ف حزب الناس و قلبك من حديد

بس الرجولة ف حزبى دمعة مِغتِرِب

كوللوماشية

سكران يا عقلى فيقانة روحى

أشرب ما أشرب مانسى جروحى

الخمر مقلب بالعقل يذهب

لكن مسيرى هارجع لنوحى

كوللوماشية

جبل وشامخ قمتة طايلة السما

 ممدود ما اطول مدتة..ياقلما


أكم وعايش عند سفحة ومنتظر


وقليل مخربش جتتة إذ ربما

كوللوماشية

طفل ف بساطتى وفيلسوف


كاتب بخطى حروف ألوف


تقدر تغير ف قلبى كلمة؟؟


تقدر ف حالة مليتة خوف

كوللوماشية

يانخل فين البلح عزت قطوفك لية



مدبوح بقلب أنجرح واللى جرح..قال أية


خايف عليك م الهوى ليتعتعك وتميل


ماعٍرٍفش إن البلح ربٌى عيال تفدية

كوللوماشية

سحابة سودة وسدٌة عين الشمس



فتحة لأخوكى ترد نور الأمس


يظهر طريقى يلالى ضىٌ وأشوف


يصبح حقيقى الحلم وألمسة لمس

كوللوماشية

يا مصر قلبى نابع منة نيل



طالع لعقلى ماشى ألف ميل


شايل بشاير....وشعب ثاير


يكنس ترابك..يوجد بديل

شيكا بيكا

شيكا بيكا يا أهل البولوتيكا



حكامنا خلاص بأو أنتيكا


ناسنا مفروسة ومهروسة


والظلم حرام عيبة عليكا


مسموح نتكلم وننمنم


ممنوع نتحرك تحريكة


والخُلق خلاص ضاق واتأزم


أغلبنا رافضين معاليكا


نصرخ ونقول الحل منين


وكلامنا يخرم أذنيكا


أطرش بسلامتك يابو صوانين


أوسع من قارة أفريكا


رادارات عطلانة نِسَمَع مين


مدخولهم خارج مزيكا


صوتنا منبوح من غير فايدة


كفياك تطبيع مع أعاديكا








دة عيالنا ف غزة متحاصرين


وحصارهم تامم بإيديكا


وشبابنا ف مصر كمان عاطلين


عَطَلِتهم تعجب زبانيكا


وحكومة وعسكر فين مانروح


تهديد ووعيد بالتفليكة


ولا يسلم منهم واد ولا بت


والعِرض أتهتك تهتيكة


أطرش بسلامتك يابو صوانين


مدخولهم خارج مزيكا


صوتنا منبوح من غير فايدة


كفياك تطبيع مع أعاديكا






سلمت الغاز من غير ماأعرف


وكأنها تركة أهاليكا


وكأن البابا فايتلك طين


والماما سابتلك فابريكا


وفلوس الشعب الغلبان فين


يا رئيس بإدارة أمريكا


ونظام صهيونى هافهم مين


مانتو الفاهمين البوليكا


عديها مصالح ياسمك أية


وأحنا ياحبيبى هانحميكا


بولوتيكا يا أهل الشيكابيكا


شيكابيكا يا أهل البولوتيكا


ناسنا مفروسة ومهروسة


والظلم حرام عيبة عليكا

مين يوصفولى حد

مين يوصفولى حد
يرسم فراش ع الورد
يزرع جنينة كبيرة
أغرس ف طينها الود
يطرح معانى كتيرة
يرجع أمان الجيرة
نرمى الهموم ف بحيرة
يحرم عليها المد
مين يوصفولى حد


الناس وشوشها كئيبة
مرسوم عليها الخيبة
مكبوتة..منقوطة
على راسها مخبوطة
والقلب حيلة اتهد

باب المحبة اتسد
مين يوصفولى حد
يهدينى مفتاحة
يعدينى بصلاحة
ينصبلى أفراحة
حبل الوصال يتمد
ما احرمش منة حد