كوللوماشية

يا مصر قلبى نابع منة نيل



طالع لعقلى ماشى ألف ميل


شايل بشاير....وشعب ثاير


يكنس ترابك..يوجد بديل

شيكا بيكا

شيكا بيكا يا أهل البولوتيكا



حكامنا خلاص بأو أنتيكا


ناسنا مفروسة ومهروسة


والظلم حرام عيبة عليكا


مسموح نتكلم وننمنم


ممنوع نتحرك تحريكة


والخُلق خلاص ضاق واتأزم


أغلبنا رافضين معاليكا


نصرخ ونقول الحل منين


وكلامنا يخرم أذنيكا


أطرش بسلامتك يابو صوانين


أوسع من قارة أفريكا


رادارات عطلانة نِسَمَع مين


مدخولهم خارج مزيكا


صوتنا منبوح من غير فايدة


كفياك تطبيع مع أعاديكا








دة عيالنا ف غزة متحاصرين


وحصارهم تامم بإيديكا


وشبابنا ف مصر كمان عاطلين


عَطَلِتهم تعجب زبانيكا


وحكومة وعسكر فين مانروح


تهديد ووعيد بالتفليكة


ولا يسلم منهم واد ولا بت


والعِرض أتهتك تهتيكة


أطرش بسلامتك يابو صوانين


مدخولهم خارج مزيكا


صوتنا منبوح من غير فايدة


كفياك تطبيع مع أعاديكا






سلمت الغاز من غير ماأعرف


وكأنها تركة أهاليكا


وكأن البابا فايتلك طين


والماما سابتلك فابريكا


وفلوس الشعب الغلبان فين


يا رئيس بإدارة أمريكا


ونظام صهيونى هافهم مين


مانتو الفاهمين البوليكا


عديها مصالح ياسمك أية


وأحنا ياحبيبى هانحميكا


بولوتيكا يا أهل الشيكابيكا


شيكابيكا يا أهل البولوتيكا


ناسنا مفروسة ومهروسة


والظلم حرام عيبة عليكا

مين يوصفولى حد

مين يوصفولى حد
يرسم فراش ع الورد
يزرع جنينة كبيرة
أغرس ف طينها الود
يطرح معانى كتيرة
يرجع أمان الجيرة
نرمى الهموم ف بحيرة
يحرم عليها المد
مين يوصفولى حد


الناس وشوشها كئيبة
مرسوم عليها الخيبة
مكبوتة..منقوطة
على راسها مخبوطة
والقلب حيلة اتهد

باب المحبة اتسد
مين يوصفولى حد
يهدينى مفتاحة
يعدينى بصلاحة
ينصبلى أفراحة
حبل الوصال يتمد
ما احرمش منة حد

كوللوماشية

يا عم يا بتاع الدوا ..دوا القلوب موجود؟


دوا القلوب ف الهوى والجودة بالموجود


تشرب قليل ترتوى تشرب كتير تنكوى


هدى إيقاع نبضتك نبضك عليك معدود

كوللوماشية

شمالى بتنطح ف يمينى


ويمينى ردت على عينى


وعنيا دمعتها عزيزة


يا عزيزة الفرقة بتبكينى

كوللوماشية

طأطأ..طاطأطأ..طؤ


رغى وشايات وسجؤ


لمة قهاوى عقيمة


تخلف رجال... بالبؤ

كوللوماشية

دأ دأ دادأ دأ دؤ


كل القلوب بتدؤ


دأ القلوب لا يشفع


طول ما العقول بتلوء

كوللوماشية

أه يا كلام من غير تفعيل


أه يا مجادلة بفهم قليــل


أوزن رأيك جواك قبلا


يطلع صوتك وزنة تقيـــل

كوللوماشية

إزاى أجرى وأنا مش شايف


إزاى هأتقدم.مش عارف


السكة وحيدة مفيش غيرها


لو حتضلمها؟.... أنا الجارف

كوللوماشية

العلم نور العلم نور


والجهل ضلمة م القبور


الرب قال للعبد أقرأ


والعبد تاة بين السطور