مين يوصفولى حد

مين يوصفولى حد
يرسم فراش ع الورد
يزرع جنينة كبيرة
أغرس ف طينها الود
يطرح معانى كتيرة
يرجع أمان الجيرة
نرمى الهموم ف بحيرة
يحرم عليها المد
مين يوصفولى حد


الناس وشوشها كئيبة
مرسوم عليها الخيبة
مكبوتة..منقوطة
على راسها مخبوطة
والقلب حيلة اتهد

باب المحبة اتسد
مين يوصفولى حد
يهدينى مفتاحة
يعدينى بصلاحة
ينصبلى أفراحة
حبل الوصال يتمد
ما احرمش منة حد

كوللوماشية

يا عم يا بتاع الدوا ..دوا القلوب موجود؟


دوا القلوب ف الهوى والجودة بالموجود


تشرب قليل ترتوى تشرب كتير تنكوى


هدى إيقاع نبضتك نبضك عليك معدود

كوللوماشية

شمالى بتنطح ف يمينى


ويمينى ردت على عينى


وعنيا دمعتها عزيزة


يا عزيزة الفرقة بتبكينى

كوللوماشية

طأطأ..طاطأطأ..طؤ


رغى وشايات وسجؤ


لمة قهاوى عقيمة


تخلف رجال... بالبؤ

كوللوماشية

دأ دأ دادأ دأ دؤ


كل القلوب بتدؤ


دأ القلوب لا يشفع


طول ما العقول بتلوء

كوللوماشية

أه يا كلام من غير تفعيل


أه يا مجادلة بفهم قليــل


أوزن رأيك جواك قبلا


يطلع صوتك وزنة تقيـــل

كوللوماشية

إزاى أجرى وأنا مش شايف


إزاى هأتقدم.مش عارف


السكة وحيدة مفيش غيرها


لو حتضلمها؟.... أنا الجارف

كوللوماشية

العلم نور العلم نور


والجهل ضلمة م القبور


الرب قال للعبد أقرأ


والعبد تاة بين السطور

كوللوماشية

قالو الرجال كلمات قولت الكلام الوان
فية كلمة تبدأ حرب وكلمة شايلة هوان
وكلمة تولد راجل وكلمة سد خانات
وكلمة حكمة احفظها وقت إن أعوزها تبان

سيرك الحمام

ماتحطنيش بيضة ف سلة


ولاتكسريش على راسي أوللة


راسى وراسة وراس التين


تهدى عنيكى شمال ويمين


تاخد بايديك ف الميادين


يامى كفايانا مذللة






شكلك وشكلى بأة نيلة


أخواتنا عايشين ب التيلة


ب انفاق وتهريب و بحيلة


لجل إن يبللو الريق بلة






لجل إن يعيشو حياة وضيعة


وطفلة مابأتش رضيعة


بنتى وبنتك يا مطيعة


ونجدة المظلوم أولى






واجبك وصلك منى حصار


يا غزة اولع نارك نار


وآخر المتمة آدى جدار


يمنع مرور قعر الحلة






وادى مشاركة إيجابية


وان واى مفاوضات يهودية


أضرب بأيدى على جراحك


تنزف جراحك ف إدية










وسماح يا بيت كل حماسى


عمرى ماهانكر ولا ناسى


انك أويت أختى وبنتى


وانى هدمتك على راسى


يابيت رجولة ووطنية










وأخر الكلام للغالية الام


قلبى عليكى عصير الهم


لا تفوتى واجبك يا اصيلة


ولا تخيلشى عليكى حيلة


اصل الحمام الوان الوان


وكل لون لية أكيلة


يكسر جناح


ويفسخ ورك


طار الحمام من باب السيرك


وأية يعود بعد ما ولى






ماتحطنيش بيضة ف سلة


ولاتكسريش على قولى أوللة


انا ضد الكسر أة


وعايشعا بألف آة


ف شوارعك وف الميادين


لكن كفاياكى مذللة