كولّوماشيه

يا رب يا مطلع ع السر و المعنى

الحق في دنيتك مش لاقي ليه مدنه

قولت ف سديد حكمتك أصبر و أنا ناصرك
...
و لحد فين يا كريم الصبر هيساعنا

كولّوماشيه

يا دولة الجواسيس الصهينه خيانه

راح أقلعك يا قميص يابو نجمه زيانه

دقت طبول النهار و السرج ع المهره
...
... ياللي كتبتوا الكتاب مكتبتى مليانه

يعيش الحمير

عزيزيتي المواطنه

عزيزي المواطن

سواء كنتي بيضه

سواء كنت داكن

سواء كنتي عايزه

حقوقك يا فايزه

سوائك مطنش

سوائك مهادن

حقوقك علينا

و خدها بإيدينا

يا شعبي المأنتخ ف كل المداين

سمعنا سعادتك

بتهتف ف صمتك

و تشكي المعايش

وبتقول مفيش

دماغك بلاطه

و إخر عباطه

وفالح تنكت

و تشرب حشيش

عيالك كتير

و همك كبير

و حالة سيادتك

يشوفها الضرير

ورغم المآسى

مطنش و ناسي

كأنك فخامتك

لذُلَّك أسير

وقومنا لجلالتك

نندد بحالتك

عملناها ثوره

و صحوة ضمير

قعدت ف مكانك

مخالف زمانك

وقولت العيال دي

وجودهم خطير

نجحنا يا خايب

يامن كنت غايب

فديتك بدمي وصوتي المهيب

وفوقت أنت لما

نجزنا المهمه

وكان ف انتصارنا

لعظمتك نصيب

ودارت دواير

يا شعبي يا حاير

رجعت أنتقملك

و عايزك مجير

لقيتك معاهم

تنفذ هواهم

و مبسوط بحالك

يعيش الحمير

تعالى معايا

وقولها كفايه

شبعنا أونطه

و بطل شخير

ما تصحى يا عمي

وهمك و همي

نسوي المظالم

نعلق مشير

مصر السما

.هو الشتا دايما كده جلاب حنين

يسقي المشاعر وحدته تطرح أنين

و السهرانين

و المغرمين ليل الشتا و الدفيانين

و كل من شد اللحاف

... و كل من عطشان لقا

و كل من عايز يخاف

و كلنا يا أهل المحبه الصابرين

الحب زين

و الصبر زين

و الحر لو سهران بيحلم

و الحر لو بايت حزين

يغضب كما النوات ويغسل

سكتك دمع العنين

يا ملهمه

ياللي زرعتي الأرض حب و مرحمه

يا كل عشاق النهار

يا كل أنصار الليالي المعتمه

يا كل حافظ للحكايه الملحمه

هي المطر هي الدفا هي السما

كولّوماشي

فينك

فينك يا مصرى 

ياللى كنت 

على الزمن قادر

أرجع يا أبويا 

و هات أخويا

فاعل ..ولا ساخر

وهات معاك حبة إراده

وإن كنت فايت شوف سعاده

وإن كنت قادر إبقى طول حبتين

وهات معاك أصل العباده

أصل العباده ماهوش بُكى

ولا كان خالقنا للنواح

فَهم أخويا ماهيش كده

كفاياه يعدد ع اللى راح

كفاياك يا أخويا ماهيش كده

إزاى تصيد من غير رِماح

جودي

جودى كما جاد الزمان على يوسف

إن الزمان و إن ذُكرتى شحيحُ

أسأل وما سؤلاى غير محبة

و أ ُشهد العشاق أنى جريحُ

نحيلة الساقين إنى متيم

فوق البساطِ و أنتى أنتى الريحُ

يا من تسافر عبر كل زمانها

سُكنه الفؤادِ ولو أردتى تريحُ

إن الحياة وإن ضنت علىّ كريمة

والعبد يُرزق..والنصيب صحيحُ

كولّوماشيّه

عينى تقول موال ف الصبر ماتقالشى

هاصبر على اللى إتقال ولا ماهصبرشى

الدنيا موج و حريق تاه اللى تاه قلبه

واللى شبط ف طريق و ف أخره ماوصلشى

كولّوماشيّه

عبد وفقير و الحيله ست عيال

ع الصبح يسرح تهد أيده جبال

صابر و راضى و الحمد طبع أصيل

سبحانه هادى رازق بطول البال

كولّوماشيّه

ياللى خلقت الخلايق خلقك ومين يضاهيه

عبدك حبيس شهوته والنفس أمرت فيه

سوءها يسوق سكته والمشى بالمقلوب

يدعى تطول رحلته مع إن طولها ...عليه

كوللوماشية

ضلمه الطريق و ف اخره طيف مشكاه

يمكن يتوه ......يمكن يضيع مسعاه

ماوصلشى غير مؤمن.. بهذا الطيف

ماوصلشى غير واثق...... بنور الله