الندل لو يحكمك يفسد كتير و يضر

و الستر فيكي إنكشف مايباتش عندك سر

يا مدلعه العواجيز

و مكتفه الفوانيس

إمتى هاشوفك فرس راكب عليكي الحر

كولّوماشيه

يا عيون ماليها الأسى و الدمع فيهم مر

يا قلوبنا يا كويسه يا مغمسه بالصبر

دي الدنيا لو تحابيش مابلاش من الشطه

ماتزوديلنا العيش هانعيش ومش هانؤر

كولّوماشيه

جتني الرصاصة فرحت حسيت بإيد باردة

غمضت عيني لمحت . الصحبة و القعدة

و فــ روقة المنتهى بعد أما قلنا خلاص

جت من الوطن أخبار إن الفتن آيده

كولّوماشيه

مبرومه ليه سكتك و الدرب ليه حالك
و الأرض من خطوتك هالك على هالك
يا ضحكتي المره..شايفك بعين حره
نفسي ولو مره..حالي يسوق حالك

كولّوماشيه

طال الطريق ما طال رجليا شايلاني مزروع على سكتك و الزرع رباني حلوه و بتكشمي و عنيكي فضاحه والحب رغم الأسى راح يعدلك تاني

كولّوماشيه

يا رب يا مطلع ع السر و المعنى

الحق في دنيتك مش لاقي ليه مدنه

قولت ف سديد حكمتك أصبر و أنا ناصرك
...
و لحد فين يا كريم الصبر هيساعنا

كولّوماشيه

يا دولة الجواسيس الصهينه خيانه

راح أقلعك يا قميص يابو نجمه زيانه

دقت طبول النهار و السرج ع المهره
...
... ياللي كتبتوا الكتاب مكتبتى مليانه

يعيش الحمير

عزيزيتي المواطنه

عزيزي المواطن

سواء كنتي بيضه

سواء كنت داكن

سواء كنتي عايزه

حقوقك يا فايزه

سوائك مطنش

سوائك مهادن

حقوقك علينا

و خدها بإيدينا

يا شعبي المأنتخ ف كل المداين

سمعنا سعادتك

بتهتف ف صمتك

و تشكي المعايش

وبتقول مفيش

دماغك بلاطه

و إخر عباطه

وفالح تنكت

و تشرب حشيش

عيالك كتير

و همك كبير

و حالة سيادتك

يشوفها الضرير

ورغم المآسى

مطنش و ناسي

كأنك فخامتك

لذُلَّك أسير

وقومنا لجلالتك

نندد بحالتك

عملناها ثوره

و صحوة ضمير

قعدت ف مكانك

مخالف زمانك

وقولت العيال دي

وجودهم خطير

نجحنا يا خايب

يامن كنت غايب

فديتك بدمي وصوتي المهيب

وفوقت أنت لما

نجزنا المهمه

وكان ف انتصارنا

لعظمتك نصيب

ودارت دواير

يا شعبي يا حاير

رجعت أنتقملك

و عايزك مجير

لقيتك معاهم

تنفذ هواهم

و مبسوط بحالك

يعيش الحمير

تعالى معايا

وقولها كفايه

شبعنا أونطه

و بطل شخير

ما تصحى يا عمي

وهمك و همي

نسوي المظالم

نعلق مشير

مصر السما

.هو الشتا دايما كده جلاب حنين

يسقي المشاعر وحدته تطرح أنين

و السهرانين

و المغرمين ليل الشتا و الدفيانين

و كل من شد اللحاف

... و كل من عطشان لقا

و كل من عايز يخاف

و كلنا يا أهل المحبه الصابرين

الحب زين

و الصبر زين

و الحر لو سهران بيحلم

و الحر لو بايت حزين

يغضب كما النوات ويغسل

سكتك دمع العنين

يا ملهمه

ياللي زرعتي الأرض حب و مرحمه

يا كل عشاق النهار

يا كل أنصار الليالي المعتمه

يا كل حافظ للحكايه الملحمه

هي المطر هي الدفا هي السما

كولّوماشي